Македонската асоцијација на издавачи (МАИ) го заврши годинашното претставување на македонската книжевност на Саемот на книгата во Франкфурт, што се одржа од 7 до 11 октомври, со многубројни професионални средби, нови меѓународни контакти и можности за превод и објавување на македонски автори во странство.
На националниот штанд, под концептот „Читај во 7/8“, беа претставени современи македонски автори и дела, книги веќе преведени на странски јазици и литература за деца. Преку каталози и промотивен настан, странските издавачи, литературни агенти и преведувачи имаа можност да се запознаат со актуелната македонска книжевна продукција и нејзиниот потенцијал за меѓународна афирмација.
Посебно внимание беше посветено на можностите за финансиска поддршка од Министерството за култура и туризам за превод и објавување домашни дела на странски јазици, како поттик за нови изданија и меѓународна издавачка соработка.
Националното претставување беше реализирано со поддршка од Министерството за култура и туризам и претставува дел од долгорочните заложби на МАИ за поголема меѓународна видливост на македонската книжевност и нејзино поврзување со нови читатели и култури.
