Македонскиот културен центар во Софија ја најавува изложбата „Ехо во мразот“ од македонскиот ликовен уметник Исмет Рамиќевиќ, што ќе биде отворена утре (29 април) во 18:30 часот.
Изложбата го обработува современиот глобален воено-политички контекст, преку симболичен пристап што ја нагласува антимилитаристичката порака на авторот и ги отсликува парадоксите на денешницата – војни, страдања и дезинформации. Рамиќевиќ се претставува со мултимедијален израз што комбинира скулптура, визуелна поезија, музика и перформанс.
На отворањето, авторот ќе изведе музички перформанс со окарина-стрела, со што ќе ѝ даде дополнителна звучна димензија на изложбата. Публиката ќе има можност активно да се вклучи и да стане дел од овој интерактивен уметнички настан.
