Shfaqja “Anna”, sipas tekstit të Dragana Lukan Nikolloskit dhe me regji të Nina Nikoliqit, e realizuar si bashkëprodhim i Teatrit Komedia dhe “Peripetija Produkcion”, nesër në mbrëmje (26 qershor) do të shfaqet në edicionin e 27-të të Festivalit Ndërkombëtar të Teatrit Kamertal “Luani i Artë” në Umag, Kroaci. Shfaqja është përzgjedhur në programin zyrtar garues dhe do të konkurrojë për Çmimin e Madh (Grand Prix).
Bëhet fjalë për një dramë bashkëkohore që përmes një historie intime dhe emocionale trajton temat e dashurisë, përkatësisë, marrëdhënieve familjare dhe lirisë personale. Shfaqja flet për çmimin e zgjedhjeve që bëjmë dhe për nevojën që të mbetemi besnikë ndaj vetvetes, edhe kur kjo nënkupton përplasje me pritshmëritë e rrethit.
Në shfaqje interpretojnë Maja Ljutkov, Blagoj Veselinov, Sasha Hanxhiq, Maja Zeqo dhe Toni Denkovski (zëri), ndërsa ekipin autorial e përbëjnë Nina Nikoliq (regjia), Ilina Angelovska (skenografia), Ivana Karanfillovska Ugurovska (kostumografia) dhe Oliver Josifovski (muzika).
Pjesëmarrja e shfaqjes “Anna” përfaqëson një mundësi të rëndësishme për promovimin ndërkombëtar të produksionit bashkëkohor teatror maqedonas dhe të zërave autorialë që formësojnë teatrin vendor sot.