“Feja nuk duhet të jetë mjet konfrontimi, por burim dialogu, pajtimi dhe ndërtimi të një të ardhmeje të përbashkët”, theksoi sekretarja shtetërore në Ministrinë e Kulturës dhe Turizmit, Marija S. Gjorgova, në hapjen e Konferencës së Katërt Botërore për Dialog dhe Bashkëpunim Ndërfetar, kushtuar temës “Feja si armë e luftës: në të kaluarën, të tashmen dhe të ardhmen”, e cila po mbahet në Shkup nga 22 deri më 26 qershor.
Duke përshëndetur pjesëmarrësit nga vendi dhe jashtë tij, përfaqësuesit e komunitetit akademik, bashkësive fetare dhe institucioneve, sekretarja shtetërore Gjorgova theksoi se konferenca zhvillohet në një periudhë sfidash serioze globale, të karakterizuara nga konfliktet e armatosura, krizat e migrantëve, rritja e intolerancës dhe përpjekjet gjithnjë e më të shpeshta për keqpërdorimin e vlerave shpirtërore për qëllime politike dhe ideologjike.
Në fjalimin e saj, Gjorgova theksoi se historia tregon se feja, kur instrumentalizohet nga interesat politike dhe ekonomike, mund të përdoret për të krijuar frikë, ndarje dhe vuajtje, por se roli i saj thelbësor është promovimi i humanizmit, dinjitetit, paqes dhe së mirës së përbashkët.
“Historia na mëson se feja, kur instrumentalizohet nga interesat politike dhe ekonomike, mund të shndërrohet në mjet për krijimin e frikës, ndarjeve dhe vuajtjeve. Por thelbi i saj është thirrje për humanizëm, dinjitet, paqe dhe të mirë të përbashkët”, theksoi Gjorgova.
Ajo vlerësoi se dallimet nuk duhet të perceptohen si pengesë, por si vlerë që kontribuon në krijimin e shoqërive më të drejta, më gjithëpërfshirëse dhe më paqedashëse, duke theksuar se Maqedonia e Veriut ka përvojë të çmuar në kultivimin e bashkëjetesës, të bazuar në respekt, dialog dhe besim ndërmjet komuniteteve të ndryshme.
Gjorgova konfirmoi përkushtimin e Ministrisë së Kulturës dhe Turizmit për mbështetjen e nismave që avancojnë interkulturalizmin, bashkëpunimin shkencor dhe kohezionin shoqëror, ndërsa përshëndeti edhe nismën për miratimin dhe promovimin e Deklaratës 2026, si një mesazh i rëndësishëm për paqe, mirëkuptim dhe respekt të ndërsjellë.
