Sektori turistik në Maqedoni vazhdon të shënojë suksese të rëndësishme. Shembulli më i fundit është „Konak Hilltop Lodge & Villa“, i cili në bashkëpunim me „Sky Macedonia“ ka hyrë zyrtarisht në prestigjiozin „Good Travel Guide“ për vitin 2026.
Projekti e kaloi me sukses procesin e vlerësimit „GTE Scan“ me rezultat maksimal prej 100 pikësh, që do të thotë se oferta është plotësisht e harmonizuar me parimet e turizmit të qëndrueshëm. Pas disa muajve përgatitje, analizash, testimesh dhe dy auditimeve të pavarura të kryera nga „Green Destinations“, ekipi maqedonas arriti të sigurojë vend mes më të mirëve.
Me këtë, Krusheva për herë të parë merr një produkt turistik të përfshirë në listën prestigjioze „Good Travel Guide Experiences“, në konkurrencë me 29 shtete dhe tre kontinente.
Oferta e njohur, e quajtur „Fly Green“, paraqet një turë paraglaiding inovative dhe të qëndrueshme që kombinon natyrën, kulturën dhe adrenalinën. Ajo përfshin akomodim në kapacitete të certifikuara ekologjikisht, shëtitje skenike në natyrë me aspekt edukativ, përvojë gastronomike me specialitete lokale nga burime të qëndrueshme, si dhe fluturime tandem me pilotë të licencuar mbi Krushevë, të shoqëruara me shpjegime profesionale dhe prezantim të pasurisë kulturore-historike.
Organizatorët theksojnë se ky sukses është rezultat i përkushtimit ndaj zhvillimit të përgjegjshëm të turizmit dhe menaxhimit të kujdesshëm të burimeve natyrore. “Ky është dëshmi se Maqedonia ka kapacitet të ofrojë përvoja turistike të qëndrueshme të nivelit botëror”, thekson ekipi.
Përfshirja në „Good Travel Guide“ përfaqëson një hap të rëndësishëm për pozicionimin e Krushevës si destinacion turistik i gjelbër dhe i qëndrueshëm, me potencial të bëhet shembull në rajon dhe më gjerë.
