Filmi debutues artistik “17” i Kosara Mitiq fitoi çmimin për filmin më të mirë në programin konkurrues “Regjisorët e rinj” në edicionin e 44-të të Festivalit Ndërkombëtar të Filmit në Uruguaj, i cili u mbajt nga 30 marsi deri më 12 prill.
Këtë vit në Festivalin, i organizuar tradicionalisht nga Kinoteka e Uruguajit në lokacione në Montevideo dhe në disa qytete të tjera si Florida, Kanelones, Roça dhe San Hoze, u shfaqën mbi 200 filma nga 67 vende të ndryshme, mes të cilëve një numër i madh premierash kombëtare dhe ndërkombëtare.
Në fokus të programit konkurrues “Regjisorët e rinj” (New Directors Competition) është promovimi i veprave debutuese dhe talenteve të rinj. Gjithashtu, duke paraqitur një përzgjedhje filmash autorialë unikë, programi ofron një platformë për zërat e rinj nga kinematografia më e re botërore.
“17” fitoi çmimin për filmin më të mirë në konkurrencë me 13 tituj, ndërsa për çmimin vendosi një juri profesionale prej tre anëtarësh, e përbërë nga: Ainoa Artetxe Uriarte – aktore dhe regjisore nga Spanja, Marianella Morena – dramaturge e njohur dhe regjisore teatri nga Uruguaji dhe Hernan Rosselli – skenarist dhe regjisor i njohur nga Argjentina.
