Në amfiteatrin e Strumicës, sonte (4.8.2026), në orën 20:30, do të hapet Festivali Ndërkombëtar i Filmit “Asterfest”. Në ceremoninë e hapjes, aktores Sinoliçka Trpkova do t’i dorëzohet çmimi “Aster” për kontributin e saj në artin filmik.
Në kuadër të mbrëmjes së parë të festivalit do të shfaqen 10 filma të shkurtër nga programi ndërkombëtar konkurrues, ndër të cilët edhe fituesi i çmimit Oscar, “Vajza që zhytej për margaritarë”, me regji të Chris Lewis dhe Maciek Szczerbowski. Menjëherë pas kësaj do të vijojë projeksioni special i dokumentarit britanik “Versus: Jeta dhe filmat e Ken Loach”, me regji të Louise Osmond.
Festivali do të vazhdojë nesër, në orën 11:00, me vizitën filmike në manastirin e Veljusës, ndërsa në mbrëmje do të shfaqen edhe shtatë filma të tjerë të shkurtër nga përzgjedhja konkurruese, përfshirë dy filma maqedonas. Më pas do të projektohet filmi artistik me metrazh të gjatë “Kështjella e Hekurt”, i regjisorit Mitko Panov, një bashkëprodhim maqedonas-zviceran-amerikan.
Hyrja në të gjitha projeksionet e festivalit, i cili do të zgjasë deri më 8 gusht, është falas.
Juria ndërkombëtare profesionale përbëhet nga Tea Kitarişvili, Bernard Diçek dhe Ana Vitanova-Ringaçeva.
“Asterfest” mbështetet nga Komuna e Strumicës dhe Agjencia e Filmit e Maqedonisë.
