Ministri i Kulturës dhe Turizmit Zoran Llutkov u takua sot me Ambasadoren e Republikës Federale të Gjermanisë, Petra Dreksler, Atasheun Kulturor Kevin Maas dhe Konsullen e Republikës së Austrisë, Barbara Gruber.
Në takimin, i cili u zhvillua në atmosferë të këndshme dhe konstruktive, u shkëmbyen mendime mbi bashkëpunimin në fushën e kulturës, gjatë të cilit bashkëbiseduesit iu referuan konkretisht ngjarjes së ardhshme Shkupi - Kryeqyteti Evropian i Kulturës 2028. Ministri Llutkov informoi për aktivitetet e kryera nga Ministria e Kulturës dhe Turizmit drejt realizimit të këtij eventi, i cili është me rëndësi të veçantë për qytetin e Shkupit dhe vendin tonë.
Në këtë kontekst, ai theksoi rëndësinë e pjesëmarrjes aktive të Ministrisë së Kulturës dhe Turizmit në krijimin e programit për ngjarjen e ardhshme, e cila duhet të paraqesë pasurinë e kulturës dhe traditës maqedonase, si dhe potencialin e përgjithshëm që kemi si qytet dhe si vend.
Bashkëbiseduesit folën edhe për bashkëpunimin në kuadër të rrjetit ndërkombëtar "Traduki" i cili ekziston prej 18 vitesh. Vendi ynë është anëtar i këtij rrjeti disa vite, në kuadër të të cilit janë mbështetur një numër i madh i veprave nga autorë maqedonas. Ambasadori në emër të tij dhe anëtarët e tjerë të rrjetit i bënë ftesë Ministrit Llutkov për të marrë pjesë në takimin e radhës të Traduki-t, i cili do të mbahet në nëntor të këtij viti në Bazel të Zvicrës. U mirëprit edhe ideja që një nga takimet e radhës të zhvillohet në vendin tonë.
Ministri Llutkov dhe Ambasadorja Dreksler gjithashtu mirëpritën bashkëpunimin e institucioneve tona me Institutin Arkeologjik në Ministrinë e Punëve të Jashtme të Republikës Federale të Gjermanisë, i cili duhet të konfirmohet me nënshkrimin e dy marrëveshjeve dypalëshe në gusht të këtij viti.
