“Maqedonia për një kohë shumë të gjatë jetoi me frikën se mos e fyente dikë nëse e donte vetveten”, tha ministri i Kulturës dhe Turizmit, Zoran Llutkov, në shënimin e 150-vjetorit të Kryengritjes së Razllovcit në fshatin Razllovci.
Në ceremoninë solemne me rastin e jubileut të Kryengritjes së Razllovcit, ministri theksoi se Razllovci përfaqëson “panteonin më të lartë të qëndresës maqedonase” dhe simbol të mosnënshtrimit që, siç tha ai, “askush nuk arriti ta heshtë”.
Në fjalimin e tij, ministri theksoi se Kryengritja e Razllovcit e vitit 1876 është një nga themelet e luftës maqedonase për liri dhe shtetësi, duke vlerësuar se pikërisht këtu “populli maqedonas e ndezi flakën që më vonë u shndërrua në një valë të fuqishme çlirimtare në gjithë Maqedoninë”.
“Heronjtë e Razllovcit nuk e mposhtën Perandorinë, por e mposhtën heshtjen, ndërsa heshtja është forma më e frikshme e robërisë”, tha Llutkov, duke shtuar se kryengritjet e vogla, në shikim të parë “të pasuksesshme”, janë shkëndijat nga të cilat lindin liritë e mëdha.
Llutkov shtoi se Ministria e Kulturës dhe Turizmit ndau rreth 25 milionë denarë për rindërtimin e plotë të Shtëpisë-Përkujtimore të Kryengritjes së Razllovcit, si dhe është realizuar një ekspozitë krejtësisht e re historike, e cila përmes fotografive dhe artefakteve e rrëfen historinë e kryengritjes. Ai shtoi se e gjithë kjo është veçanërisht e rëndësishme për ruajtjen e kujtesës historike, sepse, siç theksoi, “çdo monument i restauruar, çdo histori e ruajtur dhe çdo emër i përmendur i heronjve të Razllovcit përfaqëson një rezistencë të heshtur, por të fuqishme kundër harresës”.
Në fund, ai u shprehu respekt Dimitar Pop Georgiev Berovskit, Pop Stojan Karastoillovit, Ilija Markov – Dedo Iljo Maleshevskit, Nikola Skrizhovskit dhe të gjithë pjesëmarrësve të njohur dhe të panjohur në Kryengritjen e Razllovcit, duke vlerësuar se vepra e tyre do të mbetet një burim i përhershëm i mosnënshtrimit maqedonas, dinjitetit dhe aspiratës për liri.
