Ministri i kulturës dhe turizmit sot qëndroi në Ohër, ku u drejtua në një konferencë për shtyp në të cilën u prezantua programi për edicionin e 66-të të „Vera e Ohrit“, një nga manifestimet më prestigjioze ndërkombëtare kulturore në vend.
Në fjalimin e tij, ministri theksoi se edicioni i këtij viti ofron një ndërthurje të balancuar me kujdes mes traditës dhe rrjedhave bashkëkohore artistike, duke vazhduar kultivimin e reputacionit të lartë artistik dhe renomesë ndërkombëtare të festivalit.
„Bëhet fjalë për një program që me kujdes i ndërthur traditën dhe rrjedhat bashkëkohore artistike, duke ofruar një përjetim të denjë për reputacionin e Festivalit që për më shumë se gjashtë dekada përfaqëson simbol të kontinuitetit artistik dhe kulturor, duke afirmuar vendin tonë si një destinacion të rëndësishëm në hartën kulturore botërore“, theksoi ministri.
Ai shtoi se ngjarjet tradicionalisht do të mbahen në skenën e Teatrit Antik dhe në oborrin e kishës „Shën Sofia“, ndërsa programi përfshin paraqitje të artistëve të shquar vendas dhe të huaj nga fusha e muzikës, teatrit dhe arteve skenike.
Ministria e Kulturës dhe Turizmit, siç theksoi ministri, mbetet fuqishëm e përkushtuar në mbështetjen e ngjarjeve që e afirmojnë kulturën maqedonase në nivel ndërkombëtar dhe zhvillojnë turizmin kulturor si një segment i rëndësishëm i ekonomisë kombëtare.
Në konferencën për shtyp, drejtori i festivalit, Cuckovski, njoftoi se edicioni i këtij viti do të fillojë më 12 korrik në skenën e Teatrit Antik me gala-koncertin „Dashuri“. Në hapje do të performojnë artistë të njohur botërorë nën dirigjimin e maestro Marko Boemi, me pjesëmarrjen e divës operistike Ermonela Jaho dhe tenorit Charles Castronovo, të shoqëruar nga Orkestra e Operës Maqedonase.
Këtë vit publiku, në kuadër të edicionit të 66-të të „Vera e Ohrit“, do të ketë mundësi të ndjekë 48 ngjarje me pjesëmarrjen e më shumë se 700 artistëve nga 24 vende të Evropës dhe botës.
