„Libri është revolucioni më i heshtur që njerëzimi e njeh. Ai nuk thërret, nuk rrëzon, nuk kërkon leje, por ndryshon gjithçka“, tha ministri i kulturës dhe turizmit Zoran Llutkov në hapjen e Panairit të Librit 2026, që sot u mbajt në Shkup.
Në ngjarjen solemne, në prani të një numri të madh botuesish, autorësh, mysafirësh nga vendi dhe jashtë, si dhe shumë dashamirëve të fjalës së shkruar, ministri theksoi se Panairi paraqet „hapësirë të mendimit, imagjinatës dhe lirisë“, duke theksuar rolin e librit si shtytës i zhvillimit shoqëror.
„Ai që lexon, jeton një mijë jetë para se të vdesë. Një popull që lexon nuk mund të manipulohet lehtë. Një popull që mendon nuk mund të përçahet lehtë, ndërsa një popull që krijon nuk mund të zhduket lehtë“, theksoi Llutkov.
Ai theksoi se në kohë të informacionit të shpejtë dhe sipërfaqësor, leximi përfaqëson një akt rezistence dhe një vendim të vetëdijshëm për të menduar thellë, ku libri merr rolin e një hapësire për qetësi, përqendrim dhe mendim kritik. Një theks i veçantë u vendos te lexuesi si pjesëmarrës thelbësor në jetën e librit, pa të cilin ai mbetet vetëm potencial.
Panairi i Librit 2026 bashkon mbi 60 shtëpi botuese dhe më shumë se 130 tituj të rinj, si dhe pjesëmarrës nga disa vende evropiane dhe botërore, duke e pozicionuar Shkupin si një kryqëzim të rëndësishëm kulturor.
„Hapeni dritaren – jo vetëm drejt botëve të reja, por edhe drejt ideve, pyetjeve dhe perspektivave të reja“, ishte mesazhi me të cilin u përmbyll fjalimi i ministrit.
Panairi i Librit 2026 vazhdon në shtatë ditët në vijim, duke ofruar një program të pasur për vizitorë të të gjitha gjeneratave.
