Në kuadër të "Museumuferfest" në Frankfurt, ngjarje që çdo vit bashkon vizitorë nga rajoni dhe turistë të shumtë nga e gjithë bota, Ministria e Kulturës dhe Turizmit e promovoi me sukses Maqedoninë si destinacion kryesor evropian. Maqedonia u prezantua si vend me kulturë autentike, natyrë të paprekur, gastronomi joshëse, vend që ka lidhje me botën, siç dëshmohet nga të dhënat - në pesë muajt e parë të vitit 2025, numri i turistëve gjermanë që vizituan Maqedoninë u rrit me 219%, ose mbi 23,000 gjermanë.
Në kuadër të panairit, vizitorëve iu prezantua edhe trashëgimia e pasur kulturore e vendit tonë, vendet arkeologjike, pasuritë kulturore të paluajtshme, artefaktet, ekspozitat muzeore, të cilat janë tregues të pamohueshëm të së kaluarës sonë kulturore dhe historike.
Prezantimi në panair është një tjetër iniciativë e nxitur nga bashkëpunimi i vendosur me Institutin Arkeologjik Gjerman dhe Muzeun Arkeologjik në Frankfurt, i cili u zyrtarizua së fundmi me nënshkrimin e dokumenteve dypalëshe me Ministrinë e Kulturës dhe Turizmit dhe Muzeun e Qytetit të Shkupit.
Vizitorët e panairit patën mundësinë të shihnin edhe ekspozitën e Muzeut të Qytetit të Shkupit "Varri Masiv në Skupi - Ana e Errët e Historisë Romake", e cila u hap në Muzeun Arkeologjik në Frankfurt vitin e kaluar dhe deri më tani është vizituar nga mbi 10,000 vizitorë.
Në pritjen ceremoniale të organizuar për nder të prezantimit të vendit tonë morën pjesë Sekretarja Shtetërore e Ministrisë së Kulturës dhe Turizmit, Marija Stançevska-Gjorgova, Ambasadori Ylber Sela, Drejtori i Muzeut Arkeologjik Dr. Wolfgang David, Drejtori i Muzeut të Qytetit të Shkupit Dr. Pance Vellkov dhe të ftuar të tjerë.
