Me rastin e 35-vjetorit të pavarësisë së Maqedonisë, sonte, me fillim në orën 21:00, në sheshin para Muzeut të Maqedonisë në Çarshinë e Vjetër të Shkupit, do të mbahet ngjarja multimediale “Arti e thyen heshtjen”, e cila do të bashkojë muzikën, poezinë, artin pamor, performancën dhe kulturën bashkëkohore të klubeve.
Mbrëmjen do ta hapë Igor Xhambazov, ndërsa në pjesën zyrtare të programit do të performojnë Vesna Mikiq në harpë, Aleksandra Ilieva në saksofon, Jana Stojanovska, Mishel Trajkovski – “Skopje Via”, Laura Karliu dhe Nikola Perevski – Nokaut.
Theks i veçantë në program i është kushtuar diversitetit kulturor dhe ndërlidhjes së komuniteteve, përmes performancave të Jana Stojanovskës, Mishel Trajkovskit dhe Laura Karliut, e cila do të interpretojë këngë në gjuhën maqedonase dhe shqipe. Në kuadër të ngjarjes do të hapet edhe një ekspozitë e kuruar nga Antoni Maznevski, me vepra të Mihail Korubinit, Kalina Brajkovskës, Reshad Ahmetit, Igor Josifovit, Krsto Gligorijadesit, Angel Miovit dhe Sinisha Noveskit. Programi do të plotësohet edhe me një recital të aktores Ana Stojanovska.
Pas pjesës zyrtare, sheshi para Muzeut të Maqedonisë do të shndërrohet në një hapësirë për muzikë klubesh dhe elektronike. Do të performojë Nino Fluder, së bashku me Aleksandra Ilievën në saksofon, si dhe Ampov dhe Dimchuga nga kolektivi Buru. Performanca përmbyllëse i është rezervuar DJ-së dhe prezantueses greke të radios Myrophora nga Selaniku, anëtare e NON collective, e cila ka performuar në festivale muzikore dhe ngjarje kulturore në Greqi dhe në rajon.
