Nga 10 deri më 12 korrik, në Kalanë e Kitinës (Kitino Kale), do të mbahet edicioni i parë i Kërçova Film Festival 2026, një ngjarje që do të bashkojë filmin, muzikën dhe artin nën qiellin e hapur.
Programi i festivalit përfshin shfaqje të filmave vendorë, ballkanikë dhe evropianë, takime me regjisorë, aktorë dhe profesionistë të filmit, sesione masterclass, punëtori, ekspozitë, performanca të DJ-ve dhe shfaqje audiovizuale. Para fillimit të festivalit do të organizohet një Pre Party, ndërsa pas përfundimit do të mbahet një After Festival për shoqërim.
Në kuadër të festivalit do të organizohet edhe ceremonia solemne e mbylljes, gjatë së cilës do të ndahen dy çmime kryesore, mes të cilave edhe një çmim për vlera të përhershme në artin filmik.
Hyrja për të gjitha aktivitetet e festivalit është falas.
