„Thellë brenda vetes“ është një ekspozitë që është pjesë e një projekti kreativ gjithëpërfshirës me rastin e Ditës Ndërkombëtare të Ndërgjegjësimit për Personat me Autizëm. Ekspozita do të hapet më 31 mars (e martë), në orën 11:00, në Galerinë Çifte Amam.
Arti pamor është i rëndësishëm për zhvillimin e fëmijëve. Ata zhvillojnë imagjinatën dhe aftësinë për të menduar në mënyrë kreative, mësojnë të komunikojnë përmes vizatimeve dhe ngjyrave dhe shprehen më mirë në mënyrë joverbale sesa do të mundnin me fjalë në moshën e tyre. Kjo është veçanërisht e nevojshme dhe e dobishme për fëmijët me vështirësi në zhvillim, ndaj ekzistenca dhe nxitja e projekteve të tilla është më se e domosdoshme.
Kështu, këtë vit fëmijët patën mundësinë të mësojnë dhe të zbatojnë teknikën grafike të monotypisë. Ndryshe nga teknikat e tjera grafike, ku mund të bëhen disa kopje identike, te monotypia çdo shtypje është unike.
Tema e këtyre punëtorive ishte bota detare, ndaj duke përdorur ngjyra grafike mbi letër, fëmijët vizatuan peshq, yje deti, oktapodë, breshka deti, guaska dhe krijesa të tjera të botës nënujore. Me shtypje, me dorë ose me presë, ngjyra u transferua në letër. Rezultati i këtij procesi është një grafikë unike.
Në këto punëtori morën pjesë fëmijë nga disa shkolla: SHF „Nevena Georgieva-Dunja“, SHF „Shën Klimenti i Ohrit“, SHF „Ismail Qemali“, SHF „Imri Elezi“, DSU për rehabilitim dhe edukim „Shën Naumi i Ohrit“, Shoqata „Inkludiversa“, si dhe studentë të Fakultetit Pedagogjik „Shën Klimenti i Ohrit“ nën mentorimin e prof. dr. Burhan Ahmeti.
Edukatore e ekspozitës, e cila do të zgjasë deri më 5 prill, është Maja Dimitrova.
