Ministri i Kulturës dhe Turizmit dhe kryetar i Komisionit Kombëtar të UNESCO-s, Zoran Llutkov, po merr pjesë në sesionin e 43-të të Konferencës së Përgjithshme të UNESCO-s, që po mbahet në Qendrën Kongresuale “Rruga e Mëndafshit” në Samarkand, Republika e Uzbekistanit.
Në fjalimin e tij para të pranishmëve, ministri Llutkov theksoi përkushtimin e Republikës së Maqedonisë për avancimin e bashkëpunimit me UNESCO-n dhe pjesëmarrjen aktive në realizimin e iniciativave që bashkojnë arsimin, shkencën, kulturën dhe inovacionin në funksion të zhvillimit të qëndrueshëm.
“Vendi ynë kultivon respekt të veçantë ndaj UNESCO-s, një organizatë që e justifikon ekzistencën e saj përmes promovimit të vlerave universale dhe objektivave zhvillimore me interes të përbashkët. Jemi krenarë për kontributin që japim në promovimin dhe zbatimin e aktiviteteve të organizatës në nivel kombëtar, rajonal dhe ndërkombëtar,” tha ministri Llutkov.
Ai theksoi se qeveria maqedonase i kushton vëmendje të veçantë fushave që janë në fokusin e UNESCO-s – mbrojtja e trashëgimisë kulturore dhe natyrore, përballja me ndryshimet klimatike, si dhe zhvillimi i teknologjive të reja, digjitalizimi dhe inteligjenca artificiale.
Ministri kujtoi se në fushën e arsimit, me mbështetjen e UNESCO-s, është përgatitur një raport për cilësinë e sistemit arsimor kombëtar, i cili konfirmon se vendi po ecën drejt qasjes së barabartë, përfshirjes dhe një ambienti të sigurt shkollor.
Duke u ndalur te bashkëpunimi kulturor, Llutkov theksoi aktivitetet e realizuara në kuadër të 20-vjetorit të Konventës për mbrojtjen dhe promovimin e diversitetit të shprehjeve kulturore (2005), ku janë përfshirë aktivisht institucionet kombëtare dhe festivalet “Vera në Ohër”, “Mbrëmjet Strugane të Poezisë” dhe “Mbrëmjet Maj të Operës”.
Vëmendje e veçantë, siç theksoi ministri, i kushtohet mbrojtjes së trashëgimisë kulturore dhe natyrore, me theks në Rajonin e Ohrit – i regjistruar në Listën e Trashëgimisë Botërore të UNESCO-s më shumë se katër dekada më parë. “Si shtet, jemi përballë sfidës për të ruajtur vlerën universale të jashtëzakonshme të tij dhe për të justifikuar besimin që na është dhënë,” tha Llutkov.
Ai kujtoi gjithashtu se “Prodhimi tradicional dhe luajtja e gajdes” është regjistruar si element multinacional në Listën Përfaqësuese të Trashëgimisë Kulturore Jomateriale të Njerëzimit, dhe ekspertët maqedonas tashmë po punojnë për nominime të reja.
Ministri shprehu mirënjohje ndaj Zyrës Rajonale të UNESCO-s për Shkencë dhe Kulturë në Evropë me seli në Venecia për mbështetjen e vazhdueshme dhe kujtoi se Maqedonia këtë vit kryeson Këshillin e Ministrave të Kulturës të Evropës Juglindore, në kuadër të iniciativës për forcimin e kulturës në funksion të zhvillimit të qëndrueshëm.
Në fund të fjalimit të tij, Llutkov shprehu mirënjohje ndaj drejtoreshës së deritanishme të përgjithshme të UNESCO-s, Audrey Azoulay, për udhëheqjen e saj vizionare dhe i uroi punë të suksesshme drejtorit të sapozgjedhur të përgjithshëm, Khaled El-Enany.
“Vizionin tonë e kemi të qartë – Maqedonia të jetë një vend ku kultura, arsimi, shkenca dhe inovacioni krijojnë një sinergji të fuqishme për zhvillim të qëndrueshëm dhe mirëqenie shoqërore,” përfundoi ministri Llutkov.
