Filarmonia e Maqedonisë dje mbajti koncert në Sallën e Artë të famshme të “Musikverein” në Vjenë, një nga hapësirat koncertale më të njohura dhe më të vlerësuara në botë. Salla ishte e mbushur deri në vendin e fundit, ndërsa publiku i shpërbleu muzikantët me duartrokitje në këmbë dhe i riktheu për bis.
Koncerti, ku përveç shumë të ftuarve mori pjesë edhe sekretarja shtetërore në Ministrinë e Kulturës dhe Turizmit, Marija S. Gjorgova, përbën një moment të rëndësishëm kulturor dhe përmbyllje të festimeve për 80-vjetorin e themelimit të Filarmonisë së Maqedonisë, si dhe shënimin e 30 viteve nga vendosja e marrëdhënieve diplomatike mes Republikës së Austrisë dhe Republikës së Maqedonisë.
Si solistë performuan Ana dhe Igor Durllovski, ndërsa orkestrën e drejtoi maestro Jeruham Sharovski nga Izraeli.
Programi bashkoi traditën muzikore maqedonase me artin klasik evropian, me interpretimin e pesë këngëve tradicionale maqedonase në aranzhime orkestrale nga Soni Petrovski, “Teshkoto” nga Gligor Smokvarski, “Parafrazë maqedonase nr. 2” nga Bete Ilin dhe “Simfonia nr. 8” nga Antonin Dvorxhak.
Ngjarja edhe një herë konfirmoi pjekurinë artistike, reputacionin ndërkombëtar dhe përkushtimin e Filarmonisë së Maqedonisë për promovimin e kulturës muzikore maqedonase në skenat më prestigjioze botërore.
Performanca e Filarmonisë së Maqedonisë në Vjenë u mbështet nga Ministria e Kulturës dhe Turizmit dhe nga Ambasada e Maqedonisë në Austri, si pjesë e projektit për diplomaci kulturore dhe promovim ndërkombëtar të artit maqedonas.
