Me projektin „Pieta në mbulesat e urgjencës“ (Will my eyes be closed or open?), të artistit Velimir Zhernovski, në një koncept kuratorial nga Tihomir Topuzovski dhe Amanda Beczkes, nesër (08.05.2026) në ora 18:30 do të hapet solemnisht pavijoni maqedonas në ekspozitën më prestigjioze ndërkombëtare të artit bashkëkohor, në kuadër të edicionit të 61-të të Bienalja e Venecias, që mbahet nga maji deri në nëntor 2026 në Venecia.
Në hapje të pranishmit do t’i përshëndesë sekretarja shtetërore në Ministrinë e Kulturës dhe Turizmit, Marija S. Gjorgova.
Pavijoni maqedonas është vendosur në hapësirën ekspozuese „Ex Capella Buon Pastore“, një hapësirë historike sakrale në Venecia, me arkitekturë të veçantë dhe ambient autentik, që dëshmon funksionin e saj të dikurshëm shpirtëror. Sot, kjo hapësirë është përshtatur për ngjarje kulturore dhe ekspozita, duke ofruar një atmosferë specifike që mundëson dialog të fuqishëm ndërmjet artit bashkëkohor dhe kontekstit historik.
Pjesëmarrja e shtetit tonë në Bienalja e Venecias, e cila mbështetet plotësisht nga Ministria e Kulturës dhe Turizmit, paraqet pjesë të strategjisë afatgjatë për promovimin ndërkombëtar të kulturës dhe artit maqedonas. Në vitet e fundit, shteti është prezantuar vazhdimisht me projekte që trajtojnë tema aktuale dhe relevante, duke forcuar kështu pozitën e tij në hapësirën globale kulturore.
Edicioni i sivjetshëm, i 61-ti me radhë, kurohet nga Koyo Kouoh dhe ka temën „In Minor Keys“ („Në tonalitete moli“) – një koncept që eksploron narrativat subtile, intime dhe shpesh të margjinalizuara në shoqërinë bashkëkohore. Tema e vendos artin si hapësirë për empati, reflektim dhe rezistencë të heshtur, duke hapur pyetje mbi cenueshmërinë, kujtesën dhe përvojën njerëzore në kushte sfidash globale.
Në Bienalja e Venecias të këtij viti marrin pjesë më shumë se njëqind artistë dhe prezantohen mbi 80 pavijone kombëtare nga e gjithë bota, të cilat përmes mediave dhe qasjeve të ndryshme trajtojnë temat kyçe të kohës sonë – nga migrimi dhe ndryshimet klimatike, deri te konfliktet politike dhe çështjet e identitetit.