Kinemateka e Maqedonisë këtë vit shënon pesë dekada ekzistencë. Ajo është formuar si një institucion me rëndësi të veçantë për Republikën, me detyrë të mbledhë, përpunojë, ruajë, mbrojë dhe prezantojë filma dhe materiale filmike me rëndësi artistike, kulturore, shkencore, historike dhe shoqërore. Zyrtarisht nisi punën në vitin 1976, dy vite pas miratimit të Ligjit për formimin e Kinematekës së Maqedonisë (29 prill 1974).
Kinemateka disponon me një fond prej mbi 15.000 kopjesh filmike, më shumë se 72.000 materiale propaganduese, fotografi dhe postera, si dhe mbi 100.000 dokumente të shkruara. Brenda saj funksionon edhe një bibliotekë e specializuar me mbi 4.500 libra dhe revista për historinë dhe teorinë e filmit, si dhe 32.500 prerje gazetash. Kinemateka ka edhe një koleksion aparatesh të vjetër kinematografikë.
Materialet arkivore – pra e gjithë prodhimtaria filmike maqedonase (nga viti 1905 e deri më sot), si edhe filmat e xhiruar nga autorë të huaj në Maqedoni para Luftës së Dytë Botërore – ruhen në një departament të veçantë, në depo me temperaturë dhe lagështi të kontrolluar. Materialet e tjera filmike ndodhen në depot e kinematekës.
Në Kinematekën e Maqedonisë ekzistojnë dy sektorë: Arkivi i Filmit (i cili merret me mbledhjen, mbrojtjen, ruajtjen dhe përpunimin e filmave dhe dokumentacionit shoqërues) dhe Sektori për veprimtari kërkimore, botuese, publike dhe ndërkombëtare, bibliotekë dhe program filmik.
Kinemateka është anëtare e Federatës Ndërkombëtare të Arkivave të Filmit (FIAF), Asociacionit Evropian të Kinematekave (ACE) dhe rrjetit “Europa Cinemas”.
Me rastin e 50‑vjetorit, të mërkurën (8 prill) do të promovohet një pullë postare kushtuar Kinematekës, e realizuar nga autori Laze Tripkov.
Siç është paralajmëruar, në ngjarje do të marrin fjalën drejtori i Kinematekës, Bosko Grujoski, drejtori i “Përgjithshëm i Postave”, Bojan Keremestevski, dhe udhëheqësi i Arkivit të Kinematekës, Igor Stardelov.