Sot, në Shkup u hap konferenca e parë e zhvillimit të videolojërave në Maqedoni, "Game Dev Rev 2025", e organizuar nga Shoqata e Industrisë së Videolojërave Maqedonase (MGI).
Në fjalimin e tij drejtuar të pranishmëve, Ministri i Kulturës dhe Turizmit Zoran Llutkov theksoi se kjo konferencë nuk është vetëm promovim i videolojërave, por është simbol i kreativitetit, energjisë rinore dhe realitetit të ri kulturor dhe ekonomik për Maqedoninë.
"A e dini se çfarë kanë të përbashkët një videolojë e mirë dhe një politikë e suksesshme kulturore?" - pyeti ministri në fjalimin e tij. Të dyja fillojnë me një ide, një moment frymëzimi, i cili, nëse mbështetet në mënyrën e duhur, mund të rritet në diçka të madhe. Ndonjëherë edhe globale”, tha Llutkov.
Ministri theksoi se industria e videolojërave është sot një nga degët kulturore dhe ekonomike me rritjen më të shpejtë në botë, me të ardhura vjetore që tejkalojnë ato të industrive të filmit dhe muzikës. Kjo industri, siç theksoi ai, përfaqëson një kombinim të artit, teknologjisë, narrativit dhe dizajnit dhe krijon mundësi të reja për të rinjtë.
Ai informoi se Ministria e Kulturës dhe Turizmit i dha mbështetjen e saj iniciativës së shoqatës dhe të gjithë profesionistëve, entuziastëve dhe vizionarëve të përfshirë në të.
“Kjo nuk është vetëm konferencë, por thirrje për dizajnerët dhe programuesit tanë të rinj që të njohin potencialin e tyre, të lidhen, të mësojnë dhe të krijojnë. Këtu po ndërtohet e ardhmja e industrisë maqedonase të lojërave”, tha ministri.
Në fjalën e tij, ministri dha mbështetje më të madhe për industritë e reja kulturore, veçanërisht ato që lidhin potencialin e të rinjve me trendet globale dhe sjellin vlerë të re ekonomike në vend.
“Le ta përdorim këtë fillim për të krijuar një komunitet që do të rritet dhe do të krijojë lojëra me potencial global – por me vulë maqedonase”, tha Llutkov.
Me rëndësi të veçantë në konferencë ishte prania e përfaqësuesve nga Federata Evropiane për Zhvillimin e Lojërave Video, si dhe mbështetësve nga i gjithë rajoni dhe Evropa, që është një sinjal i fortë se Maqedonia po pozicionohet si një lojtar aktiv në hartën digjitale dhe krijuese të Evropës.
