Филмскиот фестивал за деца и млади „Џифони Македонија“ продолжува да ја шири својата мисија за подобрување на филмската култура низ повеќе градови во нашата земја. Денес и утре фестивалот „Џифони патува“ ќе се одржува во Центарот за култура во Дебар и на него ќе учествуваат учениците од дебарската гимназија, а на 2 и 3 јуни карванот „Џифони патува“ ќе се пресели во Културно-информативниот центар „Романса“ во Македонска Каменица. Следната недела на 9 и 10 јуни фестивалот ќе продолжи во Домот на културата „Лазар Софијанов“ во Кратово.
Под името „Џифони патува“, овој подвижен фестивал во изминатите години се одржа во 19 општини, а за оваа година се планирани 5 општини.
Филмската програма е намената за ученици од основни и од средни училишта и предвидува дводневни активности со прикажување европски филмови наменети за младата публика, кои опфаќаат теми што ја засегаат младата генерација. Филмските проекции ќе бидат проследени со дискусии, а потоа на една од трите понудени креативни работилници, младите ќе ја поттикнуваат својата креативност и ќе се забавуваат.
Проектот „Џифони патува“ (Giffoni on Tour) е поддржан од Агенцијата за филм на РСМ, Делегацијата на ЕУ во Скопје и општините Дебар, Македонска Каменица и Кратово, а се остварува во соработка со Амбасадата на Италија во Скопје и италијанскиот партнер „Џифони експириенс“.