Во понеделник (4 октомври) во 19 :30 часот во Театар „Комедија“ ќе се одржи книжевна вечер на која ќе биде промовирана дигиталната платформа Europe Readr, https://www.europereadr.eu/. Модераторка на настанот е Билјана Црвенковска, сценаристка, филозоф, книжевна авторка, преведувачка, уредничка и годинашна добитничка на специјалното признание за промотор на читачката култура на Саемот на книгата.
Извадоци од книгите на италијански, полски, словенечки и чешки јазик ќе читаат: Љиљана Узуновиќ, Андреј Јованчевски и Дарко Спасов. Во чест на ликот и делото на Блаже Конески и одбележување на стогодишнината од неговото раѓање, избор поезија од Блаже Конески ќе читаат: Благој Веселинов (МНТ Скопје) и Едмонд Сотир (Театар Комедија).
Иницијатор и координатор на проектот е словенечкото претседателство со Советот на ЕУ.
Организаторите информираат дека дигиталната платформа Europe Readr ги приближува актуелните социјални прашања до читателите ширум светот. Поттикнува размислување во каков свет сакаме да живееме и нуди можност Европската Унија да ја читаме како заедница во сета нејзина разновидност и во исто време како меѓусебно поврзана – како заедница со заедничка иднина.
Бројни придружни настани низ целиот свет – од Париз до Хелсинки, од Вашингтон до Пекинг – поттикнуваат воспоставување јавни простори за читање и размена на идеи за светот на иднината. Europe Readr воведува нова парадигма за европска соработка во културата, базирана на дијалог и промовирање на културата како двигател на одржлив развој и социјална вклученост.