Костадиновска-Стојчевска: За првпат Светиот оган го носиме директно од Ерусалим, и тој ќе ги осветлува нашите храмови и домови преку целата година

од admin_kult

„Првпат имаме шанса директно од Ерусалим  да го донесеме Благодатниот оган дома, во нашата држава, да го предадеме во МПЦ, и потоа тој оган ќе продолжи да ни ги осветлува и домовите и храмовите во текот на целата година“, изјави министерката за култура Бисера Костадиновска-Стојчевска пред денешната церемонија на „Преземање на Благодатниот оган“ во Базиликата на Светиот Гроб во стариот град на Ерусалим, Држава Израел.

Ова е историски чин за македонската држава, за граѓаните и за МПЦ ОА, се согласија членовите на високата македонска државно-црковна делегација, која присуствуваше и на „утрената богослужба“ во Храмот на Воскресението во Ерусалим на која чиноначалствуваше Неговата Светост, патријархот ерусалимски Теофил, во пресрет на големиот празник Воскресение.

Министерката за култура, Костадиновска-Стојчевска, истакна дека со Државата Израел досега имаме плодна соработка. Таа додаде: „Соработуваме не само на полето на културата туку и на полето на образованието, а се надевам дека таа соработка и понатаму ќе продолжи во сите сфери за кои ќе покажеме заемен интерес за размена на искуства. Потребно е да продолжиме да учиме едни од други, да учиме не само во областа на религијата туку да учиме и во областа на културата, да учиме за хуманоста, за човештвото, за победата на животот и за тоа како да бидеме подобри во она што го правиме на секојдневна основа“, рече министерката Костадиновска-Стојчевска во пресрет на големиот чин за православните христијани.

По попладневната церемонија на „Преземање на Благодатниот оган“, македонската делегација вечерва ќе пристигне во Скопје, од каде што светата светлина ќе биде пренесена до МПЦ ОА и ќе биде раширена до сите епархии и храмови во земјава. Пренесувањето на Благодатниот оган е чин на голем благослов за сите православни христијани, за здравје и успех.

Можеби ве интересира:

Страницата на Министерството за култура на РС Македонија користи т.н. „колачиња“ со цел да обезбеди подобро корисничко искуство. Прифати Повеќе