Гламурозната оперска дива, Анџела Георгиу од Романија, ќе го отвори 63.  „Охридско лето“

од admin_kult

Оперската дива, сопранот Анџела Георгиу од Романија, заедно со Оркестарот на Националната опера и балет на Македонија и под диригентската палка на Теодорашку Артаманов од Романија, на 12 јули на Античкиот театар во Охрид  ќе го отвори годинашното 63. издание на фестивалот „Охридско лето“.

Ова денеска на прес-конференција го најави директорката на НУ „Охридско лето“ Наташа Поповиќ, која истакна дека секое успешно издание на фестивалот започнува со најголемите, најславните и највозвишени уметници.

– Анџела Георгиу важи за најгламурозна оперска ѕвезда. Нејзиниот прекрасен глас ја прави сцената блескава секаде каде што настапува по светот. Се вбројува меѓу најдобрите изведувачи во историјата на операта, со исклучителен вокал, техника и длабока драмска и музичка интелигенција – рече Поповиќ.

Најавувајќи ја програмата на годинашното 63. фестивалско издание, директорката Поповиќ појасни дека големо име ќе има и во драмскиот дел од програмата.

– Големо име имаме и во делот на драмската програма, светски познатиот актер, продуцент и режисер Џон Малкович. Американската филмска ѕвезда, со проектот во режија на Михаел Штурмингер „Вечер на Џон Малкович“,  во придружба на сопраните Чен Реис и Сузан Лангбеин и Оркестарот на Виенската академија, е најексклузивниот гостин кој ќе се запише во листата на најголемите уметници кои настапиле низ фестивалската историја на „Охридско лето“ – додаде Поповиќ.

Селекторката на музичката програма на фестивалот „Охридско лето“, Бисера Чадловска, рече дека покрај спектакуларното отворање, годинава фестивалот  нуди врвни музички имиња од земјава и од светот.

– Од светските имиња, ќе издвојам неколку: светски познатиот виолинист Немања Радуловиќ и оркестарот „Дабл сенс“ (Double Sense), Френк Дупре џез-трио, како и пијано-рецитал на Френк Дупре, виолинистката Ирина Муресану со оркестарот „Фејмс“, камерниот оркестар „Кончертанте“ од Ниш, кларинетистот Пабло Бараган заедно со пијанистот Елоис Бела Кон, камерниот ансамбл „Ла Спања“ (La Spagna), дувачкиот камерен ансамбл „Камерата академика“ од Словенија, виолинистот Роман Симович, светски познатиот пијанист Алексеј Ботвинов, концерт на Јозеф Тавардос на уд и уште многу други исклучителни уметници. Од домашните имиња ќе имаме можност да ги слушнеме: пијанистите Дино Имери и Мимоза Ќека со индивидуални рецитали, пијано-дуетот Гелебешеви, триото „Аура“, традиционалниот концерт на Музичката младина на Македонија, дувачко трио со концерт посветен на флејтистот Илија Зимбо и за крај на музичката програма, ден пред свеченото затворање, хорот „Про арс“, под диригентство на Сашо Татарчевски, со едно ново создадено дело на професорот Живојин Глишиќ со наслов „Дванаесет месеци“. За роденденот на фестивалот, на 4 август, ќе слушаме фадо-музика, во изведба на Жоана Амендоеира, Педро Амендоеира и Жоао Филипе – изјави музичката селекторка, Бисера Чадловска.

Селекторката на драмската програма на фестивалот „Охридско лето“, Сања Арсовска, рече дека  театарската програма годинава може слободно да се нарече  „Издание на големите“.

– Шеесет и третото издание на „Охридско лето“, својата театарска програма ја отвора со Стивен Фридмен и Офф-Бродвеј претставата „Бикот на Фаларис“, извондредна автобиографска монодрама за еден генијален ум во потрага по одговорите на есенцијалните животни прашања, вадејќи го екстрактот на убавото во секоја човекова болка. 26 јули 2023 г. ќе остане запаметен по тоа што „Охридско лето“ ќе приреди историски настан, носејќи едно од најголемите светски актерски имиња на сите времиња, Џон Малкович. Претставата „Пеколна комедија – Исповедта на еден сериски убиец“ во режија на Михаел Штурминген, со Малкович во главната улога, во придружба на два сопрани и оркестар, на еден мрачно-комичен начин ќе ја обработи церебралната изопаченост на еден убиец. 29 јули е резервиран за уште една голема претстава, „Ана Каренина“, во продукција нa „Ујвудеки Зинхаж“ од Нови Сад, а во режија на нашиот режисер Дејан Пројковски. Една од најнаградуваните претстави во регионот во изминативе години, работена според Толстоевото големо дело со егзалтиран наратив и неговиот познат маестрален опис на малите животи и одлуките со кои може или не може да се живее – рече Арсовска.

Според неа, „Охридско лето“ ќе ја има првата премиера од  домашна продукција на 6 август, со Театарот „Јордан Хаџи Константинов-Џинот“ од Велес и претставата „Едвард Втори“ по текст на Кристофер Марлове, режирана од  украинскиот режисер Андриј Жолдак.

– На 10 август го имаме Охридскиот народен театар со „Серјожа е туп“ од Димитри Данилов, а во режија на Дајана Николовска, на 14 август Народниот театар „Војдан Чернодрински“  од Прилеп ќе даде сценски приказ на едно од најголемите книжевни дела „Декамерон“ од Џовани Бокачо, во драматизација на Лидија Митоска- Ѓорѓиевска, а во режија на феноменалниот  Мартин Кочовски. На 18 август ни доаѓа Градскиот театар од Љубљана со претставата „Нора“ од Ибзен, претстава што ја обележи оваа театарска сезона во Словенија, режирана од нашата најдобра режисерка Нела Витошевиќ, во чија главна улога настапува една од најголемите словенечки актерки, Ајда Смрекар. За затворањето на фестивалот jа имаме најголемата регионална ѕвезда, актерот Милош Биковиќ, во претставата „Лагата“ од Флоријан Зелер, во режија на Никола Љуца, а во продукција на Белградскиот драмски театар – најави драмската селекторка Сања Арсовска.

Од 12 јули до 20 август, љубителите на уметноста ќе имаат можност да уживаат во 34 концерти, седум театарски претстави,  а програмата ќе биде збогатена и со балет, изложба на фотографии и промоција на книга. „Охридско лето“ ќе биде домаќин на над 1000 уметници од 20-ина земји од светот: Србија, Чешка, Италија, Словенија, Полска, Франција, Турција, Израел, САД, Украина, Шпанија, Црна Гора, Грција, Германија, Романија, Португалија, Египет, Русија, … и, секако, уметници од Република Северна Македонија.

Можеби ве интересира:

Страницата на Министерството за култура на РС Македонија користи т.н. „колачиња“ со цел да обезбеди подобро корисничко искуство. Прифати Повеќе