Министерот за култура Асаф Адеми денеска во Министерството за култура одржа средба со дел од субјектите чии проекти поради  формални недостатоци беа одбиени на годишните конкурси за проекти од национален интерес во културата за 2019 година.

На средбата, министерот Адеми, на претставниците на дел од манифестациите во културата, им ја објасни постапката на разгледувањето на пријавите и причините кои доведоа до одбивање на нивните пријави.

Со оглед на тоа што комисиите за дел од одбиените пријави при ревизијата на резултатите од годишните конкурси утврдија дека станува збор за проекти кои се од национален интерес во културата, а во согласност со Законот за општата управна постапка, на субјектите кои доставиле пријави на годишните конкурси им се дава можност во соодветен рок да достават дополнителни појаснувања и документација за пријавите кои имале формални недостатоци.

Министерството за култура ја информира јавноста дека постапката за разгледување на пријавите доставени на годишните конкурси е во согласност со Законот за културата и дека при одлучувањето комисиите не подлегнувале на какви било притисоци, туку се раководеле според пропишаната норматива поврзана со годишните конкурси.

Според Законот за општата управна постапка, министерот има рок до 11 март да ги донесе решенијата за проектите кои се поддржани, односно одбиени на годишните конкурси.

На оваа средба присуствуваа дел од операторите во културата, а писмо со барање за доставување дополнителни појаснувања и документација за пријавите кои имале формални недостатоци ќе биде испратено до сите учесници на годишните конкурси чии проекти се одбиени од формални причини, а за кои комисиите утврдиле дека се во функција на развој, афирмација и промоција на културата во Република Северна Македонија и кои имаат предуслови да бидат избрани за проекти од национален интерес во културата за 2019 година.