Со пригодна свеченост вчера пред црквата „Свети Петар и Павле“ во Горно Лисиче традиционалниот коњанички марш се упати кон Мечкин Камен, Крушево како почеток на манифестацијата „Илинденски марш“, која оваа година се одржува по 32 – ри пат, по повод празникот Илинден.

На манифестацијата „Илинденски коњанички марш“ се обрати и државниот секретар на Министерството за култура, Дарко Стефановски кој пред присутните истакна дека преку реализацијата на оваа манифестација, повеќе од три децении успешно се пренесува и негува традицијата на нашите славни предци. 

-Нема сомнеж дека овој настан со својата атрактивност низ годините предизвикува се поголемо внимание кај македонската јавност и прерасна во една од значајните културно-историски манифестации во нашата земја, додаде Стефановски. Тој нагласи дека Министерството за култура на Република Македонија како и во минатото, така и во иднина ќе ја дава својата поддршка за оваа манифестација, бидејќи таа претставува чувар на непокорот на македонскиот народ, симбол за нашето постоење и самопотврдување.

 Од здружението „Илинденски марш – Горно Лисиче“, кои се организатори на манифестацијата информираа дека следните денови маршот продолжува преку Велес, Чашка и општина Долнени. На 31 јули коњаниците пристигнуваат во Крушево, каде ќе бидат пречекани со културно – уметничка програма, а на 2 -ри август пристигнуваат на Мечкин Камен каде ќе биде одбележан празникот Илинден.