(Вест, 08.11.2008) - Македонскиот тенор со светска кариера
Благој Нацоски вчера беше именуван од премиерот Никола Груевски за амбасадор на
културата на Македонија во Италија.
"Ќе продолжам да го промовирам ова мало парче земја кое навистина има голема
потреба од промовирање. Се надевам дека ќе се најдат уште повеќе личности што
ќе ја промовираат Македонија преку културата бидејќи, според мене, ниту еден
политичар не може толку добро да направи за една држава колку што може еден
културен работник", изјави Нацоски.
Неговата кариера почнува во 2003 година, со настапот на сцената на Римската
опера, како прв Македонец кој воопшто настапил во оваа престижна оперска куќа.
Ја исполнува улогата на Артуро во операта „Лучија од Ламермур“
од Гаетано Доницети, под диригентската палка на маестро Даниел Орен и режија на
Греан Вик. Од тогаш настапувал во Унгарија, Франција, Белгија, Јапонија,
Италија, во Австрија, Полска и во други држави.
Идната недела се враќа во Италија каде што ќе настапи во „Севилскиот берберин“, а потоа заминува за Варшава, во
Националната опера на Полска. Неговите настапи се договорени за наредните три
години. Идната година ќе настапи во Токио во Националната опера на Јапонија и
во најголемата сала во Јапонија "Сантори во" каде што ќе настапи во „Дон Џовани“ и во „Отело“.
